Om Swastyastu,Aum ano badrah kratavo yantu visvatah (mogi pikayun mautama rauh saking mudering jagat) asapunika atur pangembak pengeter baos rikala parikrama pamungkah Bulan Basa Bali VII warsa 2025 ring SMK Giri Pendawa ring rahina Soma Paing Ukir,pinanggal 24 Pebruari 2025, sane mebantang antuk "Jagat Kerthi-Jagra Hita Samasta-Nyujur Hitaning Hredaya" sane mepiteges Bulan Basa Bali pinaka altar/lapan suci genah nginggilang Basa,Aksara lan Sastra Bali sida nunggilang bhuana alit lan bhuana agunge ngapti garjitaning manah.
Manggala prawartaka I Made Agus Suciarta,S.Pd,sepisanan pinaka peliman manggala SMK Giri Pendawa widang Kesiswaan sajeroning atur piuningnyane nlatarang,parikrama Bulan Basa Bali kaping VII warsane puniki kemargiang tigang rahina ngawit mangkin lan kelaksanyang limang wimbakara minekadi Nyurat aksara Bali,Ngewacen Aksara Bali,Mesatwa Bali,Pidarta Basa Bali lan Ngeripta Puisi Bali,indik prebeya keambilang ring efesiensi dana komite,dwaning ring RKAS nenten keunggahang, Pinunas tityang ring warsane jagi rauh mangda setata keunggahang, dwaning parikramane puniki sampun pinaka pangerencana Pemerintah Propinsi Bali manut Perda No.1 Tahun 2018 tentang Bahasa,Aksara dan Sastra Bali dan Pergub Nomor 80 Tahun 2018 tentang Perlindungan dan Penggunaan Bahasa,Aksara dan Sastra Bali serta Penyelenggaraan Bulan Basa Bali lan Surat Edaran Gubernur Bali No.:15 Tahun 2024,indik pemargin Bulan Basa Bali kaping VII. baos Suciarta.
I Komang Sumarta,S.Pd,M.Pd,manggala SMK Giri Pendawa sajeroning sambrama wecanan dane maosang,Bulan Basa Bali kaping pitu puniki, kesayewyaktyannyane wantah galah sane becik pisan angge serana subakti ring para leluhur melarapan nunggilang kayun ngulati matunggilan bhuana agung kelawan bhuana alite ,sida ngeresepang daging daging sastra,aksara lan basa Baline mangdene presida nemuang santi sabda, bayu kelawan idep ,nyati rupa dados hitaning hredaya,sekadi kasurat ring bantang utawi tema Bulan Basa Bali puniki. Alit alit para sisye sareng sami,melarapan parikrama puniki ngiring tincapang rasa bakti ring leluhur pinaka guru kahuripan,sane mautama kebaos catur guru, sane gumanti presida nuntun iraga dados jatma maguna ring jagate,antuk punika ajaran guru susrusa ngiring laksanayang. yening ajaran puniki kanorayang sinah rug ikang jagat,alpaka imanusa ring catur guru lina ikang kahuripan,tan mangguh rahayu ring kahuripan,sugih gawe kurang pangan,mepecengilan ring sanak pekadangan,tan hana sor kelawan singgih,prelaya ikang jagat. Alit alit sareng sami ,asapunapi ja pawikane yan sampun dados jatma tulah,nirgawe uripe,tempal ring rerama tulah ring guru rupaka,melengkas ring guru pengajian kebaos alpaka guru pengajian,piwal ring pemerintah kesinengguh alpaka guru wisesa,napimalih tempal ring Hyang Widhi kewastanin alpaka ring guru Swadiaya,tulah pamidi tan mangguh kasukertan.kenten kebaos,antuk punika bapak ngidih, ngiring saling menghargai dan menghormati,kalau anda bisa menghargai orang lain,maka anda pasti dihargai,asapunika baos dane,Jero Komang Sumarta,nugesang.
Wus parikrama pamungkah ,lantur kemargiang wimbakara Nyurat lan Ngewacen Aksara Bali,benjang ne kemargiang Mesatua Bali lan Ngeripta Puisi Bali,rahina kaping tiga kemargiang wimbakara Pidarta Basa Bali sekadi undagan parikrama(jadwal) ring SK lan parikrama panyineb saha nyukserahang Piala,Piagam lan jinah ring para Jayanti.(manixs)
