MANUNGGALING IDEP NEMU PENGAPTI

Yayasan lan SMK Giri Pendawa,warsa 2024te puniki mepekeling wanti warsa kaping telulas kemargiang antuk parikrama pacentokan sane kabungkah rahina saniscara pahing ukir pinanggal masehi 06 Januari 2024. Manggala prawartaka karya I Komang Pande Setiawan nlatarang indik parikrama wanti warsa puniki kemargiang antuk makudang-kudang pacentokan kekawitin rahina mangkin,sane kesarengin olih wargi SMK Giri Pendawa,inggyan guru-guru,pegawai lan para sisya sami utaminipun sisya kelas X lan XII dwaning sisya kelas XI kantun ngemiletin trening ring hotel hotel sejebag Bali. Ring galah becik puniki ngiring sareng sareng remba mangda parikrama wanti warsa puniki presida memargi antar sane kemargiang ring rahina raspati pahing sapta kulantir,11 Januari 2024 sane jagi rauh. Indik prebeya keangganing antuk dana komite agengnyane wantah kutus yuta rupiah. Yadiastun asapunika ngiring margyang antuk rasa lascarya mepengayah ring sekolah puniki,yening sampun manunggaling idep pantaraning guru,pegawai lan sisya sami pastika nemu sane keaptiang. Wantah asapunika atur piuning tityang pinaka manggala prawartaka karya.Malih jebos tunas ledang dane manggala SMK Giri Pendawa mangda memungkah parikrama pacentokan nyanggra pekeling wanti warsa kaping XIII,pengaptin Komang Pande.

I Komang Sumarta manggala SMK Giri Pendawa sajeroning mamungkah parikrama inucap maosang indik wanti warsa kaping XIII puniki kemargyang amadya  dwaning pakibeh jagat lan kewentenan prebeya kantun nyutetang. yadiastun asapunika melarapan semangat wargi SMK Giri Pendawa pamekasnyani para sisya ,OSIS,guru lan pegawe saha angga yayasan kantun eling ring swadarma lan swadikaran ipun,mewetu raris prawartaka karya presida ngemargiang ilenan parikrama wanti warsa puniki. mepengawit saking pacentokan-pacentokan ring kewagedan widang perhotelan lan tataboga, taler kejangkepin antuk outbon pinaka hiburan sepisanan ngajegang seni budaya,pinih penting taler pemargi ayah ayah mereresik ring Pura Dalem Kupa sane nuwe wewidangan sekolah puniki pinaka parikrama Bakti Sosial.

Angga prawartaka ,guru,pegawai lan para sisya sami,tityang pinaka pemucuk ring SMK Giri Pendawa puniki merasa angayu bagya antuk ketulusan wargi sareng sami,saha sangkaning paswecan Ida Sanghyang Widhi Waca ring rahina Saniscara Pahing Ukir,nemonin sasih kepitu icaka warsa 1945 galah jam 09.00 wita,parikrama pamungkah pacentokan pacentokan pantaraning nyanggra Wanti Warsa kaping telulas Yayasan lan SMK Giri Pendawa tityang Bungkah, sane ngagem bantang pemargi "Melarapan pakeling wanti warsa Yayasan lan SMK Giri Pendawa kaping telulas,ngiring mekarya   nitetin kewagedan sisya manut Profil Pelajar Pancasila" asapunika penikan dane manggala SMK kelanturang antuk ngetuk mik pang tiga,maka cihna pacentokane presida kekawitin.(manixs)

Manggala SMK Giri Pendawa I Komang Sumarta.